لا الحوثيين وقعوا آوادم، ولا الشرعية خارجوا الأوادم، ولا التحالف آدمي وشفنا واحدا منهم يقلنا ياشعب اليمن احنا جيرانكم واخوانكم ونشتي لكم الخير والسعادة والرخاء والاطمئنان، ومشروعنا في اليمن بعد الحرب بناء مدارس وجامعات ومستشفيات وملاعب ومولات ومعارض وسياحة ومتنزهات وندوات ومتاحف ومسارح وسينما وهيئة عامة للترفيه ولو في شوية بطاطس وان الحال سابر والناس مستورين.
ببساطة ووضوح، احنا الأوادم الذين فقدنا بيوتنا ومدننا واهالينا وسرقت اشياؤنا ولم يعد لدينا ضمار ولا احلام ولا رواتب وعايشين حياتنا على البركة نشتي وجه يضمن لنا هذه الرغبة البسيطة في الحياة، أن نأمن ونتعايش ونبني بين الناس دولة؟ منو يقدر يقدم لنا هذا الشيء انا شاكون معه قلبا وقالبا يكون من كان.
احنا الأوادم الذين قرح مستقبلنا وعايشين يوميه نهم الراتب ولقمة الجهال ودراستهم وصحتهم وملبسهم ومستقبلهم من يقدر يخلصنا من هذه الحرب ويشلنا للعصر ويخلصنا من هذه الهموم اليومية البسيطة انا معه، يهودي كان، حوثي، سعودي، صومالي، حليب بالموز احنا معه.
احنا اللي مستقبلنا قرح جو، وماعد نشتي من الدنيا شي غير اطفالنا يدرسوا وتكمل هذه الحرب واحنا وهم سلم، اين هم رجال الدولة واينهم الجيران واينهم الاشقاء الذي بيقولوا لنا من صدق ياشعب اليمن مشروعنا دولة يحكمها العقل والمنطق والقانون، ماتحكمهاش الخرافات ولا المليشيات ولا العرق ولا المعتقد، انا معه.
اينوه ؟
نركن على الأخوان طيب؟ واين مادهجوا ندهج وراهم وقاهي الا هيه؟
اوكي طيب مش مشكلة، نسينا كذبهم حق 2011 يقولوا لنا ذلحين ما هو الجديد الذي بيقدموه للشعب اليمني؟ مفسدة صغرى ومفسدة كبرى وعسل وحبة السوداء وروافض وصعتر والعديني وعلاج الايدز وموزة حبوبة والإمارات شوعة وخلافة عثمانية هذا شغل اهبل ومايخارجناش، يقولوا لنا نشتي دولة نظام وقانون وخزقوا القانون هذا من الشق الثاني ويقولوا لنا دولة مدنية ولما انصارهم يعصدوا المدنية يدعمموا وقوانينهم خاصة ويخلونا نعيش بينهم ضجرانين من كذبهم ومع هذا ماهو مشروعكم؟ إن كان دولة لموه تلعبوا بالارقام العسكرية ولموه سالم ولموه القاعدة ولموه غزوان ولموه ولموه ولموه؟
طيب نركن على توكل وإيران وقطر؟ اوكيه تقولنا الاخت توكل إن قطر تشتي في اليمن دولة ساع تركيا وان اردوغان موافق وايران مباركة، واحنا شانصيح بسم الله، هاه ياحلف الثلاثة شلوا اليمن من حدف السعودية والإمارات وسلموها للشيخ تميم يتواله بها لما يجي كاس العالم؟
نركن على الحوثي طيب؟
ماعملوا لنا، ثلاث سنين وهم يلبجوا ودخلونا في جحر الحمار الداخلي ولا قادرين يقعوا دولة لأنهم اصلا مليشيا افكارها طائفية ولا الناس ممكن تقبل يحكمها انسان جاء يحكمها بالبنادق وبالنطفة المقدسة ، ومع هذا طيب ياحوثيين نسير بعد إيران؟ ما عملت لنا إيران هذه غير انها بتتمسوق في بلادنا وكله على خرابنا. وما شافت اليمن منهم لليوم سرور ولا عرفت العافية.
طيب نركن على الشرعية اللي وظفت كم من اهبل وجعلت القرار في يد كل فارغ وكل شبر تحرره بالله والنبي ترجع تصيح انه طحس من يدها ونرجع نلاحق ياغارتاه يادولتاه شلوا سقطرة، شلوا صحن الجن.
اين هو اليمني الخالص الذي يحب شعبه وأمته، والله لا ادي راسي معه. أين هو الجار النزيه الذي يشتي لبلادنا التطور والخير شاصيح بكل صوتي انا معه. لأنو احنا تعبنا الصدق. منو الحلف، الحزب، الآدمي، الذي يقدر يوفر لنا هذه الرغبة البسيطة في العيش، يكون من كان شاكون معه.
