فكري قاسم

فكري قاسم

تابعنى على

كل واحد يشتي يحكم اليمن بمعتقداته وجيوشه

Monday 01 June 2020 الساعة 10:20 am

طالما وكل واحد يشتي يحكم اليمن بمعتقداته وأفكاره وجيوشه وشايف نفسه هو الصح والبقية مخطئيين، والله ما نتخارج وبنجلس نتقاتل لما نغوبر بالعالم.

* * *

يا الله كلهم يتعذروا بك.. الحوثيين والإخوان والسلفيين والوهابيين والقاعدة وداعش!!

وكلهم يترافسوا فوق رؤوسنا عليك، وباسمك انت يا الله، خربوا بيوتنا وحوارينا وقرانا ومدننا وبلادنا.

شتتوا شملنا وادخلوا الكراهية والأحقاد بين الأخوة والأهل والأصحاب والجيران وجعلوا حياتنا اليومية صعبة وقاسية وكئيبة.

وأنت رب كريم عظيم مهاب وهاب للنعم والخيرات تعيش في السماء السابعة في مهام يومية عظيمة لإسعاد البشرية.

ولو كان احد من اولئك الذين دمروا حياتنا باسمك يعرفوك او يؤمنون بوجودك وبوحدانيتك ما كان فريق منهم قد فعل بنا وبك ما فعل من شرور.

* * *

تمشي في الشارع تلاقي بقالتين واربع بسطات خضار ومخبز وحلاق وثلاث صيدليات ومغسلة ومطعمين وسبعة صرافين مرصوصين يبيعوا زلط وربحهم كبير جدا بالذات هذي الايام،  والمشكلة انه كلما زاد الفقر يزداد عدد الصرافين!!

وكأن فلوس الناس كلها مخبايه عندهم والبنك المركزي اصبح مجرد دكان لبيع الزلط للصرافين والتجار عشان المواطنين يشتروا الزلط من محلات الصرافة بزلط اكثر من قيمة الزلط نفسها.

يعني لو معك حوالة بمائة الف ريال تشتريها من الصراف بمائة وستة عشر الف، والبنك المركزي يشتري المائة الالف من الصراف بثمانين الف ريال. 

في كلا الحالتين الصراف رابح، وعشان كذا كلهم رجعوا يبيعوا زلط وكله فوق ظهرك يا مواطن.

* * * 

مقعللين هانااااااك، في هذيك البلدان البعيدة وطول اليوم يمكنونا عاااااجل من مصدر موثوق عاجل من مصدر مخزوق!!!

* * *

معي اراضي وحسابات في البنوك من عفاش!!

معي مطبعة صحف اشتراها لي يحي صالح عفاش!!

معي زلط خيرات من السفير  احمد علي عفاش!!

معي معاش ورتبة عسكرية في الأمن القومي من عمار عفاش!!

معي نفوذ في الساحل الغربي ومعاش من طارق عفاش!!

معي  معاش من الاحتلال الإماراتي بدعم من عيال عفاش!!

باقي حاجة جديدة عاده محد اكتشفها لليوم غير انيس صنفور قال مؤخرا: ان معي معاش من معين عبدالملك؟!!

كل هذا الثراء معي وانا محبوط عمل مش راضي استمتع بحياتي نازح انا وعائلتي بعدن داخل غرفتين ضيقتين وصاحب البيت كل شوية يهددني بالطرد يشتي بيته.. والله ربي لا يدخلني النار، ويدي كل ممتلكاتي لصاحبي عبدالعزيزي المجيدي يكمل بهن دراسته.

*  جمعه نيوزيمن من منشورات للكاتب على صفحته في الفيس بوك.