قالوا: جهيش
قلنا الجهيش مافيش
طير الصِراب هذي السنة بلا ريش
ولاهل جهيش
على الحبيب ماشيغليش
مِنوْ الذي لــ مهجته مشنديش!!
هذي السنة ما فيش جهيش ما فيش
أيلول سرح وقفل علينا بالشيش
رعوي الدِّيَم
حتى الذري مشِلقِيش
يخور جهيش
يخرج وما يلاقيش
من الدبور
حتى الطيور مقاحيش
لا رحمك ياللي ماتزكيش
باذا الزمن كل الشهور مدابيش
قد الفرس من الهوان إكديش
والصدق في عصر الغلط ميمشيش
واذا سألت..؟
رد اللبيب:
مدريش!!!
***
ساجي العيون
أنتَ ذكي متسهيش
تذكر زمان الطل والدراديش
كل الحقول بالثامرة مفاريش
إذا خطيت بين السبول متسكيش
واطرف قطين من الجهيش ميخليش
محلى السبول مثل الكفوف مناقيش
يوم الصراب تجهش أجب ميكفيش
من يطعَمه والله العظيم مينسيش
رعوي الذّرة قلبه الحنِك مايغفيش
شغّال دوام ويشتحن بلا فيش
سِوا رِبح وإلا خِسر ميهكيش
وسط العريش
بعد الغروب ميسريش
يجهش ذرة وحواجبه منافيش
بس الجهيش من غير تعب ميحليش
***
واا يا ربيش
قلبك ندِي مشلصيش!!
وقلب الغرام دجىَ مع الطهابيش
قالِطشوه واتقاسموه مجاهيش
ضامي حزين
من غير سلا مشربيش
مهما سقيت
جِذره السقيم ميطريش!
لواعجه بين الهموم منافيش
زرعه حشيش
ومدامعه دراديش
وهو الذي من حين خُلق ميبكيش
غِلّة سنين أمست مع المهاتيش
ومن نَوَى
على القيوش شيعيش
ما في القشاوش بالحشيش ميحريش!!
أوْبِه الرّكون على الذي ميحميش
كل الوعود حق العشي مخاريش
وبنادق الحِزْبَة كما مترميش!!
للشاعر / محمد أحمد الديم
